回頭一望, 做打工仔的日子已經是十幾年前的事!
多得我最後一個老闆, 無情地, 恨恨地送我一程! 咁就送左我上創業之路!
開始時, 真係日做夜做得個吉! 但成班人一齊做, 又有另一番體會!
我好記得, 做成第一單生意果種開心! 收到第一張支票果種興奮! 張支票我有影印起, 作為記念! 到今日, 果間公司依然係我既客! 成十年朋友了!
多得我地第一任特首, 一個 IT 泡沫, 搞到我間公司即死唔使等! 人來人去, 到最後, 又只留低我同 大人兩個!
你估搵埋幾千萬唔使做咩? 一路 keep 住班客 ........ 好彩, 講到明 IT 泡沫, 好快, 幾個月, 我又捲土重來!
受到社會上我兩個大改革的幫助, 搵到幾間大機構及 financial institutes 既客人! 做完晒個 project, 我又唔係大使既人, 年年食 maintenance 都夠啦!
咁就進入左我年幾兩年既 "半退休" 人生! 嘩 ......... 肥到我不得了!
可能是整定, 玩下玩下電話, 又俾我識左幾個鬼佬 friend! 我玩完唔要既舊機, 佢地已經是最 top 既新機! 你要電話, 我又唔想要錢, 咁你地俾咩我先?
咪俾人無我有, 人地做唔到我做到既野我玩! 亦因為咁, 造就了很多奇蹟, 及之後 IMA 的出現!
當時團火燒得最熱時, 我提出上大陸! 花無百日紅! 香港人, 有邊樣野唔玩到殘晒先收手? 而且買上去賣又得! 買落黎賣又多選擇! 幾好都有!
一上去開波, 又有人自動叫合作, 幾好呀?
好? 中招啦! 自己又唔熟! 又下下依靠其他人! 一年咁上下, 唔見左好多錢! 兩年前既新年, 頂唔順, 再咁落去, 棺材本都無埋! 一於摺埋佢!
大家各散東西! 但冷靜落黎, 條氣又唔順! 又頭到尾 review 一下衰乜先 ........ ! 就咁唔玩, 又唔見錢, 最大鑊無晒面!
好! 成個 business process 由我一個人做晒! 由睇貨, 買貨, 包貨, 寄貨 ...... 全部由我一個人做! 做熟晒先交俾其他人幫手!
做左三個月, 由肥佬變成 fit 佬! 拖貨拖到人車合一! 手車不知幾利害!
六個月, 開始搵到錢! 最少填番條數先! 兩年過了, 已經做到當初定的 target 的 300%!
由當日, 一件件貨求人賣! 到而家, 我野野一手掃晒唔俾佢流出街!
我俾最好既價錢! 而且現金鋪鋪清! 唔似大陸人習慣記數! 有好野, 供應商一定第一時間 call 我!
今晚, 大人同我講, 多得其中一款 product, 兩個星期已經進帳左六位數的 "玩具錢"!
作為一份每個星期上兩次大陸既 part-time job! 我總算對自已有交代!
Work hard, play hard! 聽日, 我去行街街買玩具了
登入
問答集
搜尋
